Op 3 april 2023 is bekind gemak det de Molukse gemeinschap in 2024 de Boerebroélof meug organisere. Um as Molukse gemeinschap ein symbool en naam heej aan te gaeve is ‘De Kwante Kaketoe’ nao veure geschaove um de Molukse gemeinschap op deze manier te kenmerke veur ’t Boerebroélofsgezelschap van 2024.
De Boerebroélof van Venlo is al miër dan 100 jaor ein tradisie die op vastaolvesdinsdaag gevierd wuurt. Op dezen daag wuurt ein broédspaar in de ônech mit elkaar verbônde. Tiedes de broélof gaon alle inwoëners gekleid as boer en boerin as symbool veur de ieuwe alde tradisie.
Euver De Kwante Kaketoe
De Kwante Kaketoe is neet allein ‘n Boerebroélofsgezelschap. As Molukse gemeinschap zien weej namelik actief betrokke beej verschillende sociale en kulturele initiatieve in de gemeinte Venlo en umstreke. Weej deile ôzze Molukse identiteit mit andere en weej bliéve idderen daag liére van de minse um ôs haer. Weej vinde ’t as gemeinschap dan auk belangriék det weej brugge bouwe tösse verschillende culture en ôs heej veural in bliéve verbaetere. Um zoë same tot ‘n sterke en hechte gemeinschap te kômme.
De geschiedenis van de Molukkers in Venlo
De Molukse geschiedenis in Venlo geit truuk nao de jaore fiéftig, wie de iërste generatie Molukkers nao Venlo kwaam. Deze groep Molukkers bestond veurnamelik oét KNIL-militaire. Same mit eur gezinne werde zeej ondergebrach in ’t kamp in Blierick. De koms van dees iërste generasie Molukkers waas ein groëte oétdaging veur de Molukse gemeinschap, dink beejveurbeeld aan de taalbarrière, kultuurverschille en auk ’t gemis van femilies oét ’t geboorteland.
Ondanks de situatie wao de Molukkers in terech kwame, hebbe we door de jaore haer eine sterke band mit de stad Venlo opgebouwd. Door zich in te zette veur de gemeinschap en de eige cultuur en tradisies te behalde, is de Molukse gemeinschap oétgegreujd tot ‘n gruuetse en gewaardeerde gemeinschap in Venlo. Dit letste bliék oét ’t feit det de Molukse gemeinschap is gekaoze um de Boerebroélof, ein van de belangriékste tradisies van Venlo, te organisere.
Same make we d’r ein groët fees van
Same mit idderein oét de umgaeving Venlo en umstreke wille weej ‘n moei evenement neerzette en zölle weej d’r einen onvergeatelikke tiéd van make. Weej zien van meining det de krach zit in de gemeinschap, door idderein d’r beej te betrekke. Van muzikant wies feesvierder en van vrijwilliger tot danser. Iddere beejdrage is belangriék.
Mochtse ôs wille sponsore of op ‘n andere manier ‘n beejdrage wille levere, neem dan heej kôntak mit ôs op.